សេចក្ដីប្រកាសព័ត៌មាន
ពិធីផ្សព្វផ្សាយសៀវភៅសិក្សាកុំព្យូទ័រជាភាសាខ្មែរ និងការប្រើប្រាស់សាកល្បងកុំព្យូទ័រតម្លៃទាប
ក្នុងក្របខណ្ឌអភិវឌ្ឍផែនការមេបច្ចេកវិទ្យាព័ត៌មានសម្រាប់វិស័យអប់រំ
ពិធីផ្សព្វផ្សាយសៀវភៅសិក្សាកុំព្យូទ័រជាភាសាខ្មែរ និងការប្រើប្រាស់សាកល្បងកុំព្យូទ័រតម្លៃទាប
ក្នុងក្របខណ្ឌអភិវឌ្ឍផែនការមេបច្ចេកវិទ្យាព័ត៌មានសម្រាប់វិស័យអប់រំ
នាថ្ងៃទី២២ ខែមករា ឆ្នាំ២០០៨ នៅវិទ្យាស្ថានជាតិអប់រំ ក្រសួងអប់រំ យុវជន និងកីឡា បានប្រារព្ធពិធីផ្សព្វផ្សាយសៀវភៅសិក្សាកុំព្យូទ័រជាភាសាខ្មែរ ដែលនឹងត្រូវដាក់អោយប្រើជាផ្លូវការ សម្រាប់គ្រឹះស្ថានសិក្សានៅក្នុងព្រះរាជាណាចក្រកម្ពុជា។ សៀវភៅនេះបានបង្ហាញពីការអភិវឌ្ឍន៍ថ្មីមួយ លើប្រព័ន្ធព័ត៌មានវិទ្យាអប់រំ តាមរយៈការប្ដូរទៅប្រើកម្មវិធីកុំព្យូទ័រភាសាខ្មែរនៅគ្រប់គ្រឹះស្ថានសិក្សាទាំងអស់ ជំនួសអោយកម្មវិធីបង្រៀនកុំព្យូទ័រជាភាសាអង់គ្លេស ឬភាសាបារាំងដែលធ្លាប់មានពីមុន។
សៀវភៅសិក្សាកុំព្យូទ័រជាភាសាខ្មែរនេះ គឺជាសៀវភៅសិក្សាកុំព្យូទ័រគោល សម្រាប់ប្រើប្រាស់តាមសាលារៀន គ្រឹះស្ថានបណ្ដុះបណ្ដាលទាំងអស់ និងកិច្ចការរដ្ឋបាលរបស់ក្រសួងអប់រំ យុវជន និងកីឡា។ កម្មវិធីកុំព្យូទ័រភាសាខ្មែរ ដែលកំពុងត្រូវបានដាក់អោយប្រើ គឺជាកម្មវិធីប្រភពកូដចំហ និងឥតគិតថ្លៃ មានកម្មវិធីវាយអត្ថបទ សៀវភៅបញ្ជី អ៊ីនធឺណិត អ៊ីមែល និងកម្មវិធីផ្សេងៗទៀត។ មន្រ្ដីអប់រំថ្នាក់កណ្ដាល គ្រូឧទ្ទេសសាលាគរុកោសល្យ ព្រមទាំងគ្រូបង្រៀនដែលមកពីគ្រប់វិទ្យាល័យទាំងអស់ដែលមានកុំព្យូទ័រ បានទទួលការបណ្ដុះបណ្ដាល ដើម្បីប្រើប្រាស់ និងបង្រៀនកម្មវិធីកុំព្យូទ័រភាសាខ្មែរ។
ទន្ទឹមគ្នានេះ ក្រសួងអប់រំ យុវជន និងកីឡា ក៏បានដាក់អោយប្រើប្រាស់បន្ទប់ពិសោធន៍ស្រាវជ្រាវកុំព្យូទ័រតម្លៃទាបសម្រាប់វិស័យអប់រំ ដែលការប្រើប្រាស់កុំព្យូទ័រសាកល្បង បានបង្ហាញអោយឃើញការប្រើថាមពលអគ្គិសនីពី ១០% ទៅ ២០% ប៉ុណ្ណោះបើប្រៀបធៀបទៅនឹងកុំព្យូទ័រធម្មតា ប៉ុន្ដែលទ្ធភាពវិភាគ មានសមត្ថភាពដូចគ្នា។
បន្ទប់ពិសោធន៍ក៏បានចាប់ផ្ដើមផលិតធុងកុំព្យូទ័រជាគំរូដំបូងផងដែរ ដែលបានរៀបចំជាពិសេសសម្រាប់លក្ខខណ្ឌដែលកុំព្យូទ័រត្រូវប្រើប្រាស់នៅតាមសាលារៀន (អគ្គិសនី ធូលី និងសុវត្ថិភាព ។ល។)។ កុំព្យូទ័រសម្រាប់បន្ទប់នេះត្រូវបានឧបត្ថម្ភដោយសាជីវកម្ម Intel ។
សៀវភៅសិក្សាកុំព្យូទ័រជាភាសាខ្មែរ ត្រូវបានបោះពុម្ពដោយមានការឧបត្ថម្ភពីសហប្រតិបត្តិការអេស្ប៉ាញ InWEnt UNESCO និង VVOB។ ការប្រើប្រាស់សាកល្បងកុំព្យូទ័រតម្លៃទាបសម្រាប់វិស័យអប់រំ ត្រូវបានអនុវត្តក្រោមជំនួយរបស់សហប្រតិបត្តិការអេស្ប៉ាញ និងម្ចាស់ដៃគូអភិវឌ្ឍន៍ផ្សេងៗទៀត។
ភ្នំពេញ ថ្ងៃទី ២២ ខែ មករា ឆ្នាំ ២០០៨
